Errealaren eta Athletic-en artean Errege Kopako finala iristear den honetan, Sonakayk omenaldi berezia eskaini dio Donostiako taldeari “Txuri Urdin”-en ereserkiaren bertsio bat eginez. Hala, talde gipuzkoarrak bere ukitu flamenkoa eman dio kantuari eta derbirako alaitasunez betetako abestia sortu du.

Zoritxarrez, Sevillan ospatuko den finala ezin izango da ohiko baldintzetan jokatu. Hori dela eta, Errealak talde flamenkoarekin kontatu nahi izan du jarraitzaile gipuzkoarrei kultura andaluziarraren zati bat ekartzeko. Horrelaxe sortu da “Txuri Urdin”-en bertsio flamenko berezi hau.

Flamenkoa eta euskal musika uztartzen duen taldeak magia egin du ereserkiarekin, hainbeste espero den hitzordurako kantu alai bat eskainiz. Mutrikuko AME estudioetan grabatu da abestia Axular Arizmendiren gidaritzapean.