|
DULCE PONTES, JOSEP CARRERAS eta 7 MIRARIAK
2007.eko Maiatzak 10
Bernard Weber filantropoak sortutako New7Wonders Fundazioak Munduko 7 Mirari Berrien Deklarazio Unibertsalaren ospakizuna antolatu du. Eta datorren uztailaren 7an Lisboako "Estadio da Luz"-en burutuko den ekitaldi horren ereserkia sortzeko enkargua Dulce Pontesi egin dio Weberrek, baita Dulcek erronka onartu ere, pozarren, eta 'Todos somos um' abestia sortu. Portugaldar artistak Josep Carreras tenorearekin batera kantatuko du abesti hori Lisboako ekitaldian, orkestra baten laguntzaz, bai eta hizkuntza ezberdinetan abestuko duten herrialde eta kultura anitzetako haurrena ere.
Telebistaz mundu osoan ikusgai izango den ospakizunean, arte, politika eta kirol arloetan nazioarte mailako ospea duten zazpi pertsonek, finalista diren 21 monumentuen artean (horien artean Granadako Alhambra) irabazle zein gertatu diren argituko dute. Bozketak telefonoz eta internetez egiten ari dira, eta zabalik dago oraindik ere. 40 milioi bozka jaso dituzte honezkero. |
