|
MARIZA, "TRANSPARENTE" BIRA 2006
2006.eko Urtarrilak 18
Mariza, Portugalgo fadoaren nazioarteko enbaxadore nagusiak, “Transparente” (EMI) bere azken lana aurkeztuko du Estatuan, datorren martxoan burutuko duen biran. Aparteko ikuskizun honetan Mariza harrigarria, heldua, hunkigarria, entzuteko aukera izango dugu, poesiaz beteriko (Florbela Espançaren , Fernando Pessoaren edota Alexandre O’Neillen testuak...) errepertorio ederra baino ederragoa abestuaz.
Bira honetan honako hiritan ariko da: Ourense, A Coruña, Salamanca, Castelló, Donostia, Zaragoza eta Las Palmas de Gran Canaria.
Fadoa munduan barrena abiatzen da, poetaren esanetan, Marizak bihotzez abesten dituen hitz gardenetan. Berak zinez nahi duena zera da: “kantatzeko aske sentitzea”: bere buruaren “saudadea” omen dauka, bere fadoaren, bere patuaren bila dabil.
Marizaren fadoaren arrakasta ulertu ahal izateko bide bakarra dago, ordea: zuzenean entzutea. |
